Εκ της ευχής εις τον Κύριον ημών Ιησούν Χριστόν (Αγίου Ισαάκ του Σύρου)

Δέσποτα Κύριε Ιησού Χριστέ, ο επί Λαζάρω κλαύσας, και δάκρυα λύπης και συμπαθείας στάξας επ' αυτώ, δέξαι δάκρυα πικρίας μου. Τοις Πάθεσί σου τα πάθη μου θεράπευσον· τοις τραύμασί σου τα τραύματά μου ιάτρευσον· τω Αίματί σου το αίμα μου καθάγνισον· και την οσμήν του ζωοποιού σου Σώματος συγκέρασον τω σώματί μου. Η χολή, ην παρά των εχθρών εποτίσθης, γλυκανάτω μου την ψυχήν από της πικρίας, ης με ο αντίδικος επότισε. Το Σώμα σου, το επί ξύλου σταυρού τανυθέν, διαπετασάτω προς σε τον νου μου, των υπό των δαιμόνων κακώς ελκυσθέντα. Η κεφαλή σου, ην επί του σταυρού έκλινας, υψωσάτω μου την κεφαλήν την κολαφισθείσαν υπό των αντιπάλων. Αι πανάγιαί σου χείρες αι καθηλωθείσαι υπό απίστων εν τω σταυρώ, αναγαγέτωσάν με προς σε εκ του χάσματος της απωλείας, ως υπέσχετο το πανάγιόν σου στόμα. Το πρόσωπόν σου, το δεξάμενον ραπίσματα και εμπτύσματα υπό των καταράτων, στιλβωσάτω μου το πρόσωπον το χρανθέν εν ταις ανομίαις. Η ψυχή σου, ην επί του σταυρού ων τω Πατρί σου παρέδωκας, οδηγησάτω με προς σε εν τη χάριτί σου. 

Ουκ έχω καρδίαν οδυνηράν προς αναζήτησίν σου, ουκ έχω μετάνοιαν, ουδέ κατάνυξιν, τα επανάγοντα τα τέκνα προς την ιδίαν κληρονομίαν. Ουκ έχω Δέσποτα δάκρυον παρακλητικόν. Εσκίτισταί μου ο νους εν τοις βιωτικοίς και υλικοίς, και ουκ ισχύει ατενίσαι προς σε εν οδύνη. Έψυκταί μου η καρδία εκ του πλήθους των πειρασμών, και ου δύναται θερμανθήναι τοις δάκρυσι της προς σε αγάπης. Αλλά συ Κύριε Ιησού Χριστέ, ο θησαυρός των αγαθών, δώρησαί μοι μετάνοιαν ολόκληρον και καρδίαν επίπονον, ίνα εξέλθω ολοψύχως εις αναζήτησίν σου· χωρίς γαρ σου, παντός αγαθού ξενωθήσομαι. Χάρισαί μοι ουν, ω αγαθέ, την χάριν σου.

Κατέλιπόν σε, μη εγκαταλίπης με· εξήλθον από σου, έξελθε εις αναζήτησίν μου, και εισάγαγέ με εις την νομήν σου, και συγκαταρίθμησόν με τοις προβάτοις της εκλεκτής σου ποίμνης, και διάθρεψόν με συν αυτοίς εκ της χλόης των θείων σου Μυστηρίων· εν η και η έλλαμψις καθοράται των σων αποκαλύψεων.

Ης τινος ελλάμψεως και ημείς αξιωθείημεν χάριτι και φιλανθρωπία σου του Σωτήρος ημών Ιησού Χριστού, νυν και αεί και εις τους αιώνας των αιώνων. Αμήν.